गाडीला थांबा मिळण्याबाबत प्रवासी संघटनेच्या वतीने विभागीय रेल्वे व्यवस्थापकांना निवेदन
नागोठणे : महेंद्र माने
रेल्वेने नेहमी प्रवास करणार्‍या पेण, नागोठणे, रोहा, माणगांव कर्मचारी प्रवासी संघटनेच्या वतीने दिवा- सावंतवाडी (10105) व सावंतवाडी - दिवा (10106) या गाडीला थांबा मिळण्याबाबत शिवसेना नागोठणे उपविभाग प्रमुख संजय महाडीक,सामाजिक कार्यकर्ते विनोद आंबाडे यांच्या प्रमुख उपस्थितीत प्रवाशी संघटनेच्या सदस्यांनी विभागीय रेल्वे व्यवस्थापक यांना निवेदन देण्यात आले आहे.
साधारण 200 ते 225 प्रावाशांनी सह्या केलेल्या निवेदनात म्हटले आहे की, दिवा सावंतवाडी व सावंतवाडी - दिवा सदर गाड़ी कोविड -19 महामारी येण्यापूर्वी पेण, नागोठणे, रोहा या ठिकाणी थांबत होती. परंतु कोविड -19 लॉकडाउन दरम्यान सर्व गाड्या बंद झाल्या. व त्यानंतर जनजीवन हळूहळू पूर्व पदावर आल्यानंतर सावंतवाडी - दिवा (10106) ही गाडी सुरु करण्यात आली. सदर दिवा – सावंतवाडी (10105) गाडी पनवेल,आपटा व जिते थांबा घेते व मध्ये कुठेही न थांबता माणगाव व पुढील सर्व ठिकाणी थांबा घेते. मध्ये थांबा न घेतल्यामुळे जिथे ते माणगाव या स्थानकामध्ये असलेल्या ठिकाणच्या गरीब व गरजू प्रवाशांसह विद्यार्थ्यांचे प्रचंड हाल होत आहेत.तसेच पेण,नागोठणे व रोहा वरुन मुंबईला ये – जा करणारे प्रवाशी,कर्मचारी,अधिकारी व विद्यार्थी मोठया संख्येने प्रवास करीत असून सदरील गाडी थांबत नसल्याने त्यांची मोठ्या प्रमाणावर गैरसोय होत आहे. तसेच नेहमी सर्व ठिकाणी थांबणारी दिवा- रत्नागिरी (50103) व रत्नागिरी - दिवा (50104) या गाडीप्रमाणे दिवा सावंतवाडी (10105) व सावंतवाडी - दिवा (10106) या गाडीला सर्व ठिकाणी पूर्वीच्या वेळेप्रमाणे थांबे द्यावे व आपल्या प्रवाशांची होणारी गैरसोय थांबवावी असे लिहिले असून सदर बाबींवर सहानुभूतिपूर्वक विचार करावा ही नम्र विनंती शेवटी केली आहे. या निवेदनाची एक-एक प्रत स्टेशन प्रबंधक, पेण, नागोठणे व रोहा रेल्वे स्टेशन यांना माहितीसाठी रवाना करण्यात आली आहे.
