रोहा नगर पालिका प्रशासन अधिकाऱ्याचा निष्क्रीय कारभार! 

मराठी शाळा बंद पडण्याच्या मार्गावर!

धाटाव/रोहा : किरण मोरे

मुजोर प्रशासन अधिकाऱ्याने रोहा नगर पालिकेची सर्वात प्रतिष्ठेची असलेल्या मंगलवाडी संकुलातील प्रफुल्ल बारटक्के विद्यामंदिर शाळा क्रमांक १० येथील केंद्रप्रमुख पद हेतूपुरस्सर दूसऱ्या शाळेत हलवले, गुणवंत शिक्षकांच्या जाणीवपूर्वक बदल्या केल्या आणि एकेकाळी ३०० विद्यार्थी असणाऱ्या या शाळेचा पट अनपेक्षितपणे १०० च्या खाली आला. घसरणाऱ्या पटाचा आलेख पाहता प्रशासन अधिकाऱ्याने लवकरच शाळा बंद करण्याचा निर्धार केला असल्याचे दिसून येते. मुळात एकाच मैदानावर तीन वेगवेगळ्या नावाने शाळा भरवणे कायदेशीररित्या चुकीचे आहे असे त्यांचे म्हणणे आहे. 

घसरणीला लागलेल्या विद्यार्थी संख्येमुळे शाळा क्रमांक १० ची मंजूर शिक्षक संख्याही कमी झाली आहे. अशा परिस्थितीत पालक या शाळेत प्रवेश घेण्यासाठी उत्सुक नाहीत. याचा मोठा विपरीत परिणाम पहिलीच्या ॲडमिशनवर झालेला आहे. 

शिक्षकांमध्ये डावा/उजवा करणे ही प्रशासन अधिकाऱ्याची खासियत आहे. शासकीय कामे देताना मर्जीतील शिक्षकांना सवलत दिली जाते आणि इतरांना त्यांचे म्हणणे ऐकून न घेता उद्धटपणे बोलून अपमानास्पद वागणूक दिली जाते. 

सादर केलेल्या संचमान्यतेनुसार शाळा क्रमांक १० मध्ये मुख्याध्यापक पद मंजूर नसल्याचे दिसून येते. या शाळेवरील मुख्याध्यापकाचे प्रत्यावर्तन (Reversion) करण्याची नामुष्की शिक्षण समितीवर ओढवली आहे. रोहा नगरपालिका शिक्षण समिती व्यतिरिक्त आणखी एका नगरपालिकेची जबाबदारी प्रशासन अधिकाऱ्यावर असल्याने याचा गैरफायदा घेऊन प्रशासन अधिकारी कधीच कार्यालयात उपस्थित नसतो. त्यामुळे होणाऱ्या अन्यायाविरुद्ध दाद मागायची कुठे असा प्रश्न शिक्षकांना पडला आहे. अशा या निष्क्रीय अधिकाऱ्यावर वरिष्ठांकडून कठोर कारवाई व्हावी यासाठी लवकरच सचिवालयात पुराव्यानिशी लेखी तक्रार करण्यासाठी काही तक्रारदार पुढे देखील आलेले आहेत.