तळा नगरपंचायत निवडणुकीत भाजप सर्व जागा स्वबळावर लढवणार - बिपीन म्हामुणकर
रायगड जिल्ह्यात भाजपा एक नंबरचा पक्ष राहील- रवीभाऊ मुंढे
तळा (संजय रिकामे) : तळा शहरात दि. (१३) रोजी मराठा समाज सभागृहात भाजप कार्यकारिणीची बैठक पार पडली. या बैठकीमध्ये नुकताच शिवसेनेतून भाजपामध्ये जाहीर प्रवेश करणारे रवीभाऊ मुंढे आणि नगराध्यक्षा सौ. रेश्मा मुंढे यांचा शाल श्रीफळ देऊन सत्कार करण्यात आला. यावेळी तळा तालुका संपर्क प्रमुख बिपीन म्हामुणकर, तळा तालुका भाजपा अध्यक्ष कैलास पायगुडे, जिल्हा महिला अध्यक्षा हेमा मानकर तालुका महिला अध्यक्षा राजेश्री सोलम, जिल्हा महिला चिटणीस सौ. श्रद्धा घाग, मा. नगराध्यक्षा रेश्माताई मुंढे, शहर अध्यक्ष सुधीर तळकर, सरचिटणीस रमेश लोखंडे, सुरेश शिंदे, ओबीसी जिल्हा कार्यकारणी सदस्य गोविंद कीर्तने, रितेश मुंढे, विलास ठसाळ, सुरेश मुंढे, ज्ञानेश्वर घरटकर, श्री. शिगवण, तालुका उपाध्यक्ष मंगेश सावंत, जयेंद्र पाशिलकर, जिल्हा युवा चिटणीस प्रशांत सकपाळ, प्रवीण भौड, सुनील वाढ आणि असंख्य कार्यकर्ते उपस्थित होते.
सभेच्या सुरवातीला दलित मित्र व जेष्ठ पत्रकार नारायणराव मेकडे यांना श्रद्धांजली वाहण्यात आली. आजच्या कार्यकारिणीच्या बैठकीत येणाऱ्या निवडुकीची रणनीती आखण्यात आली. सभेचे अध्यक्ष बीपीन म्हामुणकर यांनी नगरपंचायत निवडणुकीत सर्वच्या सर्व जागा स्वबळावर लढवण्याचा ठराव मांडला या ठरावास सर्वानुमते अनुमोदन देण्यात आले. येणाऱ्या निवडणुकीत भाजप कुठेही कमी पडणार नाही असा विश्वास कार्यकर्त्यांना त्यांनी या वेळेस दिला. तळा शहराचा विकास हा भाजपच्या माध्यमातूनच होणार असा ठाम विश्वास त्यांनी या वेळेस दिला.
तळा तालुक्यात जेव्हा मी मुंबईतून आलो तेव्हा शिवसेना वाढवण्याचं काम मी तळागाळात जाऊन केलं. परंतु आता पंतप्रधान नरेंद्र मोदी आणि विरोधी पक्ष नेते देवेंद्र फडणवीस यांच्या मार्गदर्शनाखाली पक्षाची ध्येय धोरणे शेवटच्या घटका पर्यंत पोचविण्यासाठी प्रयत्न करणार असल्याचे त्यांनी सांगितले. भाजपने माझ्यावर जो विश्वास दाखवला आहे त्याला मी कधीच तडा जाऊन न देता संपूर्ण मतदार संघात भाजप वाढीसाठी कार्य हाती घेउन, काही दिवसातच भाजप पक्ष रायगड जिल्ह्यात नंबर एकचा पक्ष होईल असे रवी रवीभाऊ मुंढे यांनी यावेळी आपल्या भाषणात सांगितले.
काही योजना अशा आहेत कि त्या सामान्य जनतेपर्यंत पोहचत नाही त्या सर्व योजना घराघरात नेऊन त्यांचा नागरिकांना लाभ करून द्या असं तालुका अध्यक्ष कैलास पायगुडे यांनी यावेळेस बोलताना कार्यकर्त्यांना सांगितले. या कार्यक्रमात तळे शहरात खूप विकासाची कामे अपूर्ण आहेत, तालुक्यातील बाजारपेठ मंदावली आहे. हि बाजारपेठ पुन्हा कशी फुलेल आणि स्थानिकांना कसा रोजगार निर्माण होईल या सर्व गोष्टींचा विचार करून पक्षामार्फत सर्व प्रश्न मार्गी लावण्याचं काम मी हाती घेतलं आहे, त्या संदर्भात वरिष्ठांशी बोलणं सुरू झालं असून लवकरच हे काम मार्गी लावण्याचा मी प्रयत्न करणार असल्याचे अॅड.निलेश रातवडकर यांनी सांगितले.
