सरकारी नियमांचे उल्लंघन करणाऱ्या हुतामाकी आणि पारले बिस्किट्स कंपनीवर कारवाई कधी? खालापूर प्रेस संपादक पत्रकार सेवा संघाचे तहसीलदारांना स्मरण पत्र
वावोशी (प्रतिभा शेवाळे) : खालापूर तालुक्यातील शिरवली विभागातील हुतामाकी प्रा. लि. कंपनी आणि पारले बिस्किट्स या दोन्ही कंपन्या कोरोना नामक घातक आणि जीवघेण्या भयंकर रोगाविषयी गंभीर नसल्याचे दिसून आले आहे. या कंपन्या सरकारी नियमांचे उल्लंघन करून सोशल डिस्टनसिंगला फाटा देऊन कामगारांची बसने वाहतूक करीत आहेत. त्यामुळे प्रेस संपादक पत्रकार सेवा संघाकडून खालापूरचे तहसीलदार इरेश चप्पलवार यांना या कंपन्यांना सरकारी नियमांचे पालन करीत नसून सोशल डिस्टनसिंगचेही उल्लंन करीत असल्याचे निवेदनाद्वारे निदर्शनास आणून दिले होते. परंतू आज या निवेदनास महिना व्हायला आला तरीही या कंपन्यामध्ये कोणत्याही प्रकारचा बदल झालेला नसून याऊलट या कंपन्यांनी सरकारी नियमांना केराची टोपली दाखवण्यात आली आहे. तरीही शासनाकडून या मुजोर कंपन्यांवर योग्य ती कारवाई करण्यात यावी याकरिता खालापूर प्रेस संपादक पत्रकार सेवा संघाकडून पुन्हा एकदा खालापूरचे तहसीलदार इरेश चप्पलवार यांना स्मरण पत्र देण्यात आले. यावेळी नायब तहसीलदार राजश्री जोगी, निवासी नायब तहसिलदार कल्याणी कदम, खालापूर पत्रकार सेवा संघाचे अध्यक्ष संतोष शेवाळे, राजू भंडारी सचिव आणि प्रेस संपादक पत्रकार सेवा संघाचे सदस्य उपस्थित होते.
