गोरेगाव पोलीसांचे कोंबिंग ऑपरेशन, अनेक वाहने ताब्यात घेतली 



माणगांव (प्रतिनिधी) :
देशातील अनेक राज्यात कोरोना विषाणूने धुमाकूळ घातला असून याचे पडसाद आता रायगड जिल्ह्यातील श्रीवर्धन, पोलादपुर, महाड तालुक्यात उमटू लागले आहेत. असे असताना देखील गोरेगांव, लोणेरे विभागातील नागरिकांमध्ये या भयानक अशा कोरोना विषाणूबाबत गांभीर्याने घेतले जात नाही. अखेर गोरेगांव पोलीसांनी सोमवारी सकाळपासून नाकाबंदी करुन कोंबिंग ऑपरेशन करण्यास सुरुवात केली असून चारचाकी, तीनचाकी आणि असंख्य दुचाकी वाहने ताब्यात घेऊन कामाशिवाय विनाकारण बाहेर फिरणाऱ्यांवर कडक कारवाई करण्यास सुरुवात केली आहे.


यासंदर्भात गोरेगांव पोलीस ठाण्याचे पोलीस उपनिरीक्षक अक्षय सोनावणे यांनी माहिती देताना म्हटले की, जिल्ह्यातील माणगांव तालुक्याच्या काही कि.मी.वर असणाऱ्या नजीकच्या श्रीवर्धन, महाड, पोलादपूर तालुक्यात गेल्या तीन-चार दिवसांपासून कोरोनाबाधीत रुग्ण सापडण्यास सुरूवात झाली असून यांचे गांभीर्य गोरेगाव, लोणेरे विभागातील नागरिकांमध्ये दिसून येत नाही. सकाळच्या सुमारास परिस्थितीचे गांभीर्य न ओळखता आपल्या ताब्यातील चारचाकी, तीनचाकी, दुचाकी वरून डबल, ट्रिपल सिट घेऊन असंख्य नागरिक महत्वाचे काम नसताना देखील घराबाहेर बेधडक फिरताना दिसतात. अखेर सोमवारी सकाळी वरिष्ठ अधिकाऱ्यांच्या मार्गदर्शनाखाली गोरेगांव पोलिस ठाण्यातील सर्व पोलिसांनी लोणेरे, गोरेगांव विभागात नाकाबंदी करून कोबिंग ऑपरेशन करण्यास सुरुवात केली असून विनाकारण फिरणा-यांची असंख्य वाहने ताब्यात घेतली असून या वाहन चालकांविरूद्ध मोटार व्हेईकल अॅक्ट नुसार कारवाई करण्यात येणार असल्याचे उपनिरीक्षक सोनावणे यांनी स्पष्ट करून वैद्यकिय किंवा जीवनावश्यक वस्तूंची गरज असेल तरच घरातील एका व्यक्तीने आपल्या वहानाने घराबाहेर पडावे. नाहक कामा शिवाय फेरफटका मारायला निघालात तर या पुढे कडक कारवाईला सामोरे जावे लागेल असा इशारा देऊन यापुढे परिस्थितीचे भान ठेऊन घरीच रहा, सतर्क आणी सुरक्षित रहा असे जाहिर आवाहन सोनावणे यांनी केले आहे.

Popular posts from this blog