नागोठणे येथे जमातुल मुस्लिमीनतर्फे उत्साहात 'इफ्तार' संपन्न; जिल्हा परिषद सदस्य सुमित काते यांची प्रमुख उपस्थिती

नागोठणे (सुहेल पानसरे) :- पवित्र रमजान महिन्याचे औचित्य साधून नागोठणे येथे सामाजिक सलोखा आणि एकतेचे दर्शन घडले असून दरवर्षीप्रमाणे यंदाही 'जमातुल मुस्लिमीन नागोठणे' यांच्या वतीने रोजेदारांसाठी भव्य इफ्तार कार्यक्रमाचे आयोजन करण्यात आले होते. या सोहळ्याला राजकीय, सामाजिक आणि पोलीस प्रशासनातील मान्यवरांनी उपस्थिती लावून सर्वधर्मसमभावाचा संदेश दिला. या कार्यक्रमाला नवनिर्वाचित जिल्हा परिषद सदस्य सन्माननीय सुमितजी काते यांनी प्रमुख पाहुणे म्हणून उपस्थिती दर्शवली, तर नागोठणे पोलीस ठाण्याचे पोलीस निरीक्षक सचिन कुलकर्णी यांची देखील विशेष उपस्थिती लाभली. आज रमजान महिन्याचा २५ वा रोजा असून पहाटे ५:२४ वाजता सहरी केल्यानंतर सायंकाळी ६:५० च्या सुमारास इफ्तारची वेळ झाली होती. 

यावेळी जुम्मा मस्जिद नागोठणे यांचे इमाम जनाब जव्वाद मापकर यांनी विशेष प्रार्थना (दुआ) केली, ज्यामध्ये देशामध्ये शांतता, समृद्धी आणि बंधुभाव टिकून राहावा अशी प्रार्थना करण्यात आली. या प्रसंगी उपसरपंच अखलाक पानसरे, दिनेश घाग, किरण लाड, संजय कंधारे, प्रकाश मोरे यांसह मस्जिद कमिटीचे सर्व आजी-माजी सदस्य आणि गावातील मान्यवर मोठ्या संख्येने उपस्थित होते. सर्वांनी एकत्रितपणे इफ्तारचा आनंद घेतला. हा संपूर्ण कार्यक्रम यशस्वी करण्यासाठी 'नवजवान-ए-जमातुल मुस्लिमीन नागोठणे' या तरुण मंडळाने विशेष परिश्रम घेतले असून गेल्या अनेक वर्षांची ही परंपरा या तरुणांनी अत्यंत शिस्तबद्ध पद्धतीने जपली आहे. केवळ मुस्लीम बांधवच नव्हे, तर इतर समाजातील नागरिकही या सोहळ्यात सहभागी झाले होते, ज्यामुळे नागोठणे शहराच्या सांस्कृतिक वैविध्याचे आणि एकोप्याचे दर्शन घडले.