म्हसळा तालुका महसूल विभागात मंडळ अधिकारी पद रिक्त, ज्युनिअर तलाठ्याकडे मंडळ अधिकारी पदभार
नागरिकांमध्ये नाराजी, शासनाचे दुर्लक्ष?
म्हसळा (प्रतिनिधी) : म्हसळा तालुक्यातील महसूल विभागात सावळा-गोंधळ सुरु असून त्याचा फटका सामान्य जनतेला बसत आहे. विशेषतः म्हसळा तालुकासारख्या दुर्गम भागातून गावखेड्यातून येणाऱ्या गोर-गरीब जनतेची कामे रखडली आहेत. त्यामुळे प्रांताधिकारी, तहसिलदार यांच्या बाबत नाराजी व्यक्त होत आहे.
म्हसळा महसुल विभागात मंडळ अधिकारी दोन पदे रिक्त असून एका जागेसाठी प्रभारी मंडळ-अधिकारी म्हणून "साहेबांचा मर्जीतील ज्युनिअर तलाठी" कडे मंडळ-अधिकारी पदभार देण्यात आला आहे.
येथे वरीष्ठ अधिकारी असताना त्यांना डावलून मात्र ज्युनिअर तलाठी यांना पदभार देऊन नागरिकांकडे कामांबाबत वारस नोंद, पंचनामे तसेच संबंधित इतर कामे यासंदर्भातील अपूर्ण माहीतीमुळे गोरगरीब जनतेची कामे हेतुपुरस्सर रखडत ठेवली जात आहेत. त्याचप्रमाणे 'साहेबांच्या मर्जीतील' तलाठ्याकडे मंडळ अधिकारी पद असल्याने गोरगरीब जनतेला उद्धटपणाने वागणूक मिळत आहे. यामुळे नागरीकांमधून नाराजी व्यक्त होत असून ज्युनिअर तलाठ्याकडून मंडळअधिकारी पदभार काढण्यात यावा अन्यथा तालुक्यांतील नागरिक आंदोलन करण्याच्या पावित्र्यात असल्याची नाक्या-नाक्यावर चर्चा सुरु आहे.
