अलिबागजवळ समुद्रात प्रवासी बोट बुडाली, ८८ प्रवाशांना सुरक्षित बाहेर काढले
रायगड (किरण बाथम) :
अलिबागजवळ समुद्रात प्रवासी बोट बुडाल्याची घटना घडली आहे. मुंबईहून मांडवा येथे प्रवासी घेऊन निघालेल्या या बोटीचा अपघात झाला आहे. खडकावर आदळून बोट कलंडली आहे. या बोटीत ८८ प्रवाशी होते. या सर्व ८८ प्रवाशांना पोलीसांच्या बोटीने सुखरूप बाहेर काढण्यात यश आलं आहे.
प्रवाशी सुखरूप बाहेर आले असून सुदैवाने अनर्थ टळला आहे. जेट्टीजवळ पोहोचत असताना अचानक ही बोट एका बाजूला कलंडली. बोट बुडत असल्याचे लक्षात येताच तिथे असलेली पोलिसांची पेट्रोलिंग बोट मदतीला धावून गेली. पोलिसांच्या पेट्रोलिंग बोटीवरुन प्रवाशांना सुखरुप जेट्टीवर पोहोचवण्यात आले. त्यांपैकी आठ जणांना स्पीड बोटीच्या मदतीने किनाऱ्यावर पोहोचवण्यात आले.
भाऊचा धक्का ते मांडवा दरम्यान रो रो सेवा लवकरच सुरु होणार आहे. या बोटीच्या चाचण्या सुरु झाल्या आहेत. या दरम्यान अपघात झाला. मांडवा येथे बोटीची पहिली चाचणी पार पडली. मात्र चाचणी दरम्यान मांडवा टर्मिनलवर बोट धडकली.
भाऊचा धक्का ते मांडवा दरम्यान रोरो जलवाहतूक सेवेला रविवार १५ मार्च पासून सुरूवात होणार आहे. या पार्श्वभूमीवर बोटीच्या चाचण्यांना सुरूवात झाली आहे.
पहिली चाचणी व्यवस्थित पार पडली. पण दुसऱ्या चाचणी दरम्यान ही बोट मांडवा टर्मिनलवर धडकली. अपघात किरकोळ स्वरूपाचा होता. मग मात्र कप्तानाने बोट मागे घेऊन व्यवस्थित थांबविली. यानंतर आतील बोटीतील गाड्या सुरक्षितपणे बाहेर काढण्यात आल्या.
