चेन्नई येथे राष्ट्रीय वॉटरपोलो स्पर्धेत महाराष्ट्राला कांस्यपदक!
महाराष्ट्र संघात रायगडच्या नागोठणे रिलायन्स हेल्थ क्लब स्विमिंग पुलच्या सात खेळाडूंचा समावेश
रायगडच्या शिरपेचात मानाचा तुरा
शिहू-रायगड, दि. १५ (मंजुळा म्हात्रे) :- चेन्नई येथे नुकत्याच पार पडलेल्या ७९ व्या सिनियर नॅशनल वॉटरपोलो चॅम्पियनशिप २०२६ या अत्यंत प्रतिष्ठेच्या राष्ट्रीय स्पर्धेमध्ये महाराष्ट्र पुरुष वॉटरपोलो संघाने आपल्या उत्कृष्ट आणि आक्रमक सांघिक खेळाचे प्रदर्शन करत कांस्यपदकावर आपले नाव कोरले आहे. देशभरातील एकूण चौदा राज्यांच्या तगड्या संघांनी या स्पर्धेत सहभाग घेतला होता, ज्यामुळे ही स्पर्धा कमालीची चुरशीची ठरली. या खडतर स्पर्धेत महाराष्ट्राच्या खेळाडूंनी कमालीची जिद्द, शिस्त आणि अप्रतिम सांघिक समन्वयाच्या जोरावर उपांत्यपूर्व आणि उपांत्य फेरीत मजल मारली. कांस्यपदकासाठी झालेल्या चुरशीच्या सामन्यात महाराष्ट्र संघाने बलाढ्य बंगाल संघाचा पराभव करत ऐतिहासिक विजय संपादन केला आणि पदक तालिकेत मानाचे स्थान मिळवले.
या ऐतिहासिक विजयाचे सर्वात मोठे वैशिष्ट्य म्हणजे, महाराष्ट्र संघात रायगड जिल्ह्यातील नागोठणे येथील रिलायन्स हेल्थ क्लब स्विमिंग पूलच्या तब्बल सात गुणवान खेळाडूंचा समावेश होता. शिहू, बेणसे आणि झोतिरपाडा या ग्रामीण भागातून आलेल्या साहिल कुथे, ऋतिक शिर्के, सुजल भोय, ओमकार माळी, दिनांशू कुथे, मनीष कोकाटे आणि निखिल शिंदे या सात खेळाडूंनी संपूर्ण स्पर्धेत आपल्या उत्कृष्ट खेळाची चुणूक दाखवत महाराष्ट्राच्या विजयात सिंहाचा वाटा उचलला. या खेळाडूंनी राष्ट्रीय स्तरावर दाखवलेल्या कौशल्यामुळे रायगड जिल्ह्याच्या क्रीडा क्षेत्राच्या शिरपेचात मानाचा तुरा रोवला गेला आहे. खेळाडूंच्या या उल्लेखनीय आणि दैदिप्यमान यशामागे महाराष्ट्र संघाचे एनआयएस (NIS) प्रशिक्षक सुनील पवार यांचे अष्टपैलू मार्गदर्शन आणि त्यांनी घेतलेले अथक परिश्रम अत्यंत मोलाचे ठरले आहेत. त्यांच्याच कुशल नेतृत्वाखाली संघाने राष्ट्रीय स्तरावर महाराष्ट्राचा झेंडा अभिमानाने फडकवला. या शानदार कामगिरी बद्दल रिलायन्स इंडस्ट्रिजचे अध्यक्ष शशांक गोयल, इस्टेट मॅनेजर अजिंक्य पाटील, हेड एचआर गौतम मुखर्जी, एचआर विनय किर्लोस्कर आणि सचिव उदय दिवेकर यांनी सर्व विजेत्या खेळाडूंचे विशेष कौतुक केले असून, त्यांना पुढील वाटचालीसाठी आणि उज्ज्वल भविष्यासाठी हार्दिक शुभेच्छा दिल्या आहेत. खेळाडूंच्या या यशामुळे सध्या संपूर्ण महाराष्ट्रातून आणि विशेषतः रायगड जिल्ह्यातून त्यांच्यावर कौतुकाचा वर्षाव होत आहे.
Comments
Post a Comment