आदिवासी समाजातील पहिली महिला वकील सपना वाघमारे यांचा मंत्री आदिती तटकरे यांच्या हस्ते गौरव!
पुढील शिक्षणासाठी लंडनला रवाना होणार
रोहा-रायगड, दि. १० (प्रतिनिधी) :- अत्यंत प्रतिकूल परिस्थितीवर मात करत आणि कठीण काळाशी दोन हात करत आदिवासी कातकरी समाजातील पहिली महिला वकील होण्याचा बहुमान मिळवणाऱ्या रायगड जिल्ह्यातील कोलाड चिंचवली येथील कु. सपना राजेश वाघमारे हिचा नुकताच मुंबईतील मंत्रालयात विशेष सत्कार करण्यात आला.
महाराष्ट्राच्या महिला व बालविकास मंत्री कु. आदितीताई तटकरे यांच्या हस्ते हा गौरव सोहळा संपन्न झाला. सपना वाघमारे हिने आपल्या जिद्दीच्या आणि कष्टाच्या जोरावर मिळवलेले हे यश केवळ तिच्या कुटुंबासाठीच नव्हे, तर संपूर्ण आदिवासी समाजासाठी अत्यंत अभिमानास्पद आणि दिशादर्शक ठरले आहे. तिने घेतलेल्या या उत्तुंग झेप बद्दल तिचे सर्व स्तरांतून कौतुक होत आहे.
सपनाचे हे यश केवळ वकिलीची पदवी मिळवण्यापुरते मर्यादित राहिलेले नाही, तर ती आता तिच्या पुढील उच्च शिक्षणासाठी थेट लंडनला रवाना होत आहे. परदेशात जाऊन उच्च विद्याविभूषित होण्याचे स्वप्न उराशी बाळगणाऱ्या सपनाने या प्रवासात अनेक अडचणींचा सामना केला, मात्र तिने कधीही हार मानली नाही. सर्वात कौतुकाची आणि महत्त्वाची बाब म्हणजे, परदेशातून उच्च शिक्षण पूर्ण केल्यानंतर तिथेच न रमता किंवा वैयक्तिक फायद्याचा विचार न करता, आपण घेतलेल्या शिक्षणाचा उपयोग हा केवळ आणि केवळ आपल्या समाजाच्या परिवर्तनासाठी आणि प्रगतीसाठीच करू, असा ठाम निश्चय तिने केला आहे. तिच्या या उदात्त विचारांमुळे तिच्या यशाचे महत्त्व अधिकच अधोरेखित झाले आहे.
मंत्रालयात आयोजित करण्यात आलेल्या या कौतुकास्पद प्रसंगी मंत्री आदिती तटकरे यांनी सपनाच्या पाठीवर कौतुकाची थाप दिली आणि तिच्या उज्ज्वल भविष्यासाठी तिला मनापासून शुभेच्छा दिल्या. एका अत्यंत दुर्गम भागातून आणि वंचित घटकातून पुढे येऊन आंतरराष्ट्रीय पातळीवर शिक्षण घेण्याचा तिचा हा प्रवास समाजातील इतर गरजू आणि होतकरू मुलींसाठी नक्कीच प्रेरणादायी ठरेल, असा विश्वास यावेळी व्यक्त करण्यात आला. या महत्त्वपूर्ण आणि अभिमानाच्या क्षणी सपना वाघमारे हिच्यासोबत तिचे मामा श्री. भिवा पवार आणि मामी सौ. ज्योत्स्ना पवार हे देखील उपस्थित होते, ज्यांच्या चेहऱ्यावर आपल्या भाचीच्या या ऐतिहासिक कामगिरीचा सार्थ अभिमान स्पष्टपणे झळकत होता.
Comments
Post a Comment