जिल्हाधिकाऱ्यांकडून मतमोजणी केंद्राची पाहणी
मतमोजणी अनुषंगाने तयारीचा घेतला आढावा
रायगड (प्रतिनिधी) :- 32 रायगड लोकसभा मतदारसंघाची मतमोजणी दि. 4 जून रोजी नेहूली येथील जिल्हा क्रीडा संकुलात स. 8 वाजेपासून सुरु होणार आहे. जिल्हाधिकारी तथा निवडणूक निर्णय अधिकारी किशन जावळे यांनी आज पाहणी केली. तसेच तयारीच्या अनुषंगाने संबंधिताना सूचना दिल्या.
यावेळी पोलीस अधीक्षक सोमनाथ घार्गे, अपर जिल्हाधिकारी सुनील थोरवे, उपजिल्हा निवडणूक अधिकारी स्नेहा उबाळे, उपविभागीय अधिकारी ज्ञानेश्वर खुटवड, महेश पाटील, अधीक्षक अभियंता सुखदेवे यांसह विविध विभागाचे अधिकारी उपस्थित होते. यावेळी मतमोजणीच्या अनुषंगाने स्थापन करण्याचे विविध कक्ष, सोयीसुविधांची उभारणी, उमेदवारांसाठी व्यवस्था, माध्यम प्रतिनिधींसाठी माध्यम कक्ष, मतमोजणी पथके या अनुषंगाने पाहणी करून चर्चा करण्यात आली. तसेच केलेल्या तयारीचा आढावा घेतला.
वाहनतळांची जागा निश्चिती, वाहतूक वळविणे आदी अनुषंगाने चर्चा करण्यात आली. मतमोजणीच्या अनुषंगाने विविध घटकांना कोणताही त्रास होणार नाही तसेच कायदा व सुव्यवस्थेचा प्रश्न निर्माण होणार नाही यादृष्टीने सर्व ती खबरदारी घेण्याच्या सूचना यावेळी देण्यात आल्या.मतमोजणीच्या अनुषंगाने सुरक्षा उपाययोजनांवरही यावेळी चर्चा झाली. मतमोजणी शांततेत आणि निवडणूक आयोगाच्या निर्देशानुसार पार पडेल, याची दक्षता घ्यावी, आवश्यक सुविधांची तातडीने व्यवस्था करावी, अशा सूचना श्री जावळे यांनी यावेळी दिल्या.
