माहिती अधिकार कार्यकर्ता महासंघाचे राज्यपाल व मुख्यमंत्री कार्यालयांना निवेदन

रोहा : किरण मोरे

मंत्रालय मुंबई येथे माहिती अधिकार कार्यकर्ता महासंघाच्या वतीने मुख्यमंत्री, उपमुख्यमंत्री, प्रधान सचिव यांना निवेदन देण्यात आले. तसेच राजभवन येथे राज्यपाल कार्यालयातही निवेदन देण्यात आले. 

प्रमुख मागण्या पुढील प्रमाणे : कोकण भवन, औरंगाबाद व नाशिक येथील माहिती आयुक्तांच्या रिक्त जागा तातडीने भरा. तुंबलेली 90 हजार द्वितीय अपीले तातडीने निकाली काढा. कार्यरत आयुक्त निवृत्त होण्यापूर्वीच नवीन आयुक्त निवड प्रक्रिया पूर्ण करून ठेवा. आयुक्तांचे पद रिक्त ठेऊ नये. आयुक्तांची निवड निवृत्त न्यायाधीश, समाजसेवक, पत्रकार या क्षेत्रातील नामवंत व्यक्तीची व्हावी. जनमाहिती आणि प्रथम अपील अधिकारी यांना माहिती अधिकार अधिनियम २००५ चे प्रशिक्षण सक्तीचे  व अनिवार्य करा. शासकीय कर्मचारी व नागरिकांसाठी माहिती अधिकार  प्रशिक्षण व प्रचारासाठी  निधीची पुरेशी अर्थसंकल्पीय तरतूद करा. सर्व जनता व नागरिकांमध्ये  माहिती अधिकाराचा प्रसार व प्रचार व्हावा म्हणून पुस्तके, व्हिडिओ, चित्रपट, अभ्यास साहित्य असे प्रचार साहित्य जनतेसाठी मोफत उपलब्ध करून द्या. माहिती अधिकार अधिनियम २००५ चा विध्यार्थ्यांना सुलभ व सुबोध परिचय व्हावा म्हणून शालेय अभ्यासक्रमात समावेश करा. 

निवेदनात वरील विषयाची मागणी करण्यात आली. माहिती अधिकार कार्यकर्ता महासंघाचे अध्यक्ष श्री. सुभाष बसवेकर यांच्या नेतृत्वाखाली मुंबई ठाणे पालघर रायगड येथील ४० कार्यकर्ते उपस्थित होते.