शिव वडापाव झुणका भाकर केंद्राचे अनिल नवगणे यांच्या हस्ते उद्घाटन

स्वर्गीय बाळासाहेब ठाकरे, मीनाताई ठाकरे यांचे स्मारक बांधणार - डाॅ. मनोज पाथरे 

तळा (संजय रिकामे) : शिववडापाव व झुणका भाकरी केंद्राचे उद्घघाटन शिवसेना दक्षिण रायगड जिल्हा प्रमुख अनिल नवगणे यांच्या शुभहस्ते दि. १ मार्च रोजी १२.३० वा. करण्यात आले. यावेळी माजी जिल्हा प्रमुख प्रमोद घोसाळकर, शहर प्रमुख राकेश वडके, उपनगराध्यक्षा सायली खातु, गटनेते अॅड. चेतन चव्हाण, जेष्ठ नगरसेवक विठोबा चांडीवकर डॉ. मनोज पाथरे, डॉ. कविता पाथरे, ज्येष्ठ शिवसैनिक डॉ. चंद्रकांत विचारे, ज्येष्ठ पत्रकार किशोर पितळे, महिला शहर संघटक नम्रता पाडळकर, शिवसैनिक आणि तळेवासी मोठ्या संख्येने उपस्थित होते.

उद्घाटन प्रसंगी अनिल नवगणे म्हणाले की, पैसे सर्वजण कमवतात पण त्याचा वापर नियोजनबध्द करणे महत्त्वाचे आहे व माणसांमध्ये देण्याची दानत असावी लागते, दानशूर पणा लागतो. आपण समाजाचे काही तरी देणे लागतोय या भावनेतून डॉ. पाथरे यांनी शिव वडापाव व झुणका भाकर केंद्र सुरु केले आहे. खेडेगावातील गोरगरीब जनतेला शासकीय कामासाठी, औषधोपचारासाठी शहरात यावे लागते त्यांची भूक शमविण्यासाठी वडापाव, किंंवा झुणका भाकरी खावून मिटणार आहे. हे खाद्य पदार्थ कमी दरात उपलब्ध करून व स्वच्छ पाणी पाण्याची सोय केली आहे.हि चांगल्या प्रकारची जनसेवा त्यांनी केली आहे. डाॅ. पाथरे भाजप पक्षाला राम राम करून शिवसेनेच्या कार्यप्रणालीवर प्रेरीत होऊन सेनेचे झाले आहेत. शिवसेना पक्ष त्यांच्या पाठीशी नेहमी असेल असे आश्वासन यावेळी दिले. येत्या नजीकच्या काळात नगरपंचायतीच्या सर्वच्या सर्व जागा मिळवून पुन्हा सत्ता द्या. रखडलेला विकास पूर्ण करू असे उद्घाटन प्रसंगी जनतेला आवाहन केले.
डॉ. मनोज पाथरे हे मनोगत व्यक्त करताना म्हणाले की, शिवसेना पक्षाच्या कार्यप्रणाली वर प्रभावित होऊन पक्ष प्रवेश केला. या पक्षाने तळावासियांसाठी जवळपास १० कोटींची वावे धरणातून पाणी योजना मंजूर करून आणली. हिंदु हृदयसम्राट स्वर्गीय बाळासाहेब ठाकरे, माँ साहेब यांचे तळा तालुक्यात स्मृती स्मारक उभे करण्यासाठी भविष्यात मी प्रयत्नशील राहणार आहे ते लवकर कसे पूर्ण केले जाईल या दृष्टीने काम करणार आहे असे यावेळी त्यांनी सांगितले.