वावे धरणातून तळा शहराला मिळणार 135 दशलक्ष लिटर पाणी - पालकमंत्री आदिती तटकरे

तळा (संजय रिकामे) : तळा नगरपंचायतीच्या दररोज लागणाऱ्या पाण्याचा प्रश्न लवकरच सुटणार असून याविषयीचे निवेदन आज मंत्रालय येथे राज्यमंत्री तथा रायगड जिल्ह्याच्या पालकमंत्री कु. आदिती तटकरे यांनी उपमुख्यमंत्री अजितदादा पवार यांना दिले. याबाबत उपमुख्यमंत्री श्री. पवार यांनी सकारात्मक प्रतिसाद देत त्यांनी जलसंपदा विभागास तळा नगरपंचायतीचा प्रश्न तात्काळ सोडविण्याबाबत निर्देश दिले. 
या नगरपंचायतीला दैनंदिन सुमारे 135 दशलक्ष लिटर इतक्या पाण्याची आवश्यकता आहे. त्याबाबतचा प्रस्ताव नगरपंचायतीमार्फत मुख्य अभियंता, कोकण विभाग यांना देण्यात आलेला आहे. तळा नगरपंचायती नजीकच्या 3 कि.मी. अंतरावर असलेल्या वावे धरणातील पाण्याचा वापर करुन तळा शहरातील जनतेला पिण्यासाठी हा पाणीपुरवठा होऊ शकेल. त्यानुसार रायगड जिल्ह्यातील वावे धरणातील 135 दशलक्ष लिटर पिण्याच्या पाण्यासाठीच्या आरक्षणाबाबत पालकमंत्री कु. आदिती तटकरे व खासदार सुनील तटकरे यांनी उपमुख्यमंत्री श्री. अजित पवार यांना विनंती केली आहे.