कोरोनाला रोखण्यासाठी कोलाड, खांब कडकडीत बंद, जिल्हाधिकाऱ्यांच्या आवाहनाला व्यापाऱ्यांचा उत्स्फूर्त प्रतिसाद

रायगड (भिवा पवार) : देशात व राज्यात कोरोनाचा वाढता प्रादुर्भाव रोखण्यासाठी मागील तीन-चार महिन्यांपासून विविध स्तरावर लॉकडाऊन केले जात आहे. यामुळे देशात हाहाकार माजवत कोरोना मुबंईसह सर्वत्र राज्यात व जिल्ह्यातील ग्रामीण भागात पोहचला. 22 मार्चपासून लॉकडाऊनवर लॉक डाऊन केले तरीदेखील त्याचा प्रादुर्भाव ग्रामीण भागात पोहचला. गेले तीन महिने ग्रामीण भागातील नागरिकांनी देखील कोरोनाला रोखण्यासाठी प्रशासकीय यंत्रणेला सहकार्य केले. हातमजुरी करणाऱ्यांनी देखील या भीतीपाई हालाकीचे दिवस काढले. तरीही कोरोनाच्या वाढत्या संसर्गाचा ताप कमी झालेला नाही. कोरोनाला रोखण्यासाठी रायगड जिल्ह्यात दहा दिवसांसाठी लॉकडाऊन करण्यात आले. दरम्यान, कोलाड, खांब नाका येथे कडकडीत बंद करत व्यापाऱ्यांनी उत्स्फुर्तपणे प्रतिसाद दिला आहे.

रायगड जिल्ह्यासह तालुका स्तरावर कोरोनाचा वाढता प्रादुर्भाव रोखण्यासाठी थेट जिल्हाधिकारी यांनी 15 जुलै रात्री बारा वाजल्यापासून ते 26 जुलै या कालावधीत संपूर्ण रायगडात दहा दिवस लॉकडाऊन पुकारला असून त्याला सर्वच स्तरांतून उत्स्फुर्त प्रतिसाद मिळत असल्याचे दिसून येत आहे.

अनेक उपाय योजना करूनही कोरोनाचा वाढता प्रादुर्भाव

रोहा तालुक्यात गेल्या महिन्याभरात कोरोना बाधितांची संख्या तीनशेहून अधिक गेली. त्यात पाच जणांचा मृत्यू झाला हे दुर्दैव आहे. त्यातच एक महिन्याच्या कालावधीत तब्बल रोहा बाजारपेठ ही वीस दिवसांहून अधिक काळ लॉक आऊट म्हणून बंदच होती. त्यादरम्यान कोलाड, खांब हेदेखील अधून मधून बंद ठेवण्यात येत होते. परंतु कोरोना काही कमी झाला नाही त्याउलट त्याचा दुप्पटीने संसर्ग वाढत गेला आणि संपूर्ण रोहेकरांसाठी कोरोनाच्या संकटाची भर अधिक वाढत जाऊन मोठी धास्ती निर्माण झाली. त्याचबरोबर संपूर्ण जिल्ह्यातील कोरोना बाधितांची संख्या एकूण नऊ हजाराच्या आसपास पोहचली असून 230 जणांचा मृत्यू झाला आहे त्यामुळे दिवसेंदिवस वाढती संख्या ही रायगडात धोकादायक ठरत असल्याचे दिसून येत आहे. त्यामुळे या दहा दिवसांच्या लॉकडाऊनमध्ये प्रशासकीय यंत्रणेला कोरोनाला हद्दपार करण्यात कितपत यश मिळेल याकडेच लक्ष वेधले जात आहे.