लोणेरे येथे अवैध दारूविक्री करणाऱ्याला पकडले
लोणेरे (प्रतिनिधी) : माणगाव तालुक्यांतील लोणेरे येथे अवैधपणे दारूची विक्री कित्येक दिवस चालू होती. सध्या जिल्ह्यात चालू असलेल्या लाॅकडाऊनमुळे तळीरामांची चांगलीच अडचण झाली असली तरी लोणेरे परिसरात अवैध रितीने दारू विक्री जोरदार चालू होती. बाईक वर दारू विक्री करताना ग्राहकाला घरपोच दारू चढ्या दरात मिळत होती. त्यामुळे लोणेरे परिसरांत तळीरामांनी धुमाकूळ घातला होता. पाहिजे तिथे पोच दारू मिळाल्याने लोणेरे परिसरांत शाळांच्या चौथऱ्यावर, ग्राऊंडमध्ये, मोकळ्या जागेत, नदीवर दारूच्या बाटल्यांचा खच बघायला मिळत आहे. याबाबतची तक्रार देखील येथील नागरिकांनी केली होती.
याचीच दखल घेत गोरेगाव पोलीस ठाण्याचे पोलीस निरीक्षक अनिल टोंपे यांच्या मार्गदर्शनाखाली पथकाने लोणेरे येथे गावडे चाळीच्या मागे धाड टाकत माल १४,८०० रूपयांचा मुद्देमाल जप्त केला असून ओंकार शांताराम तवटे (रा. लोणेरेवाडी) यास अटक केली आहे. याप्रकरणी गोरेगाव पोलीस ठाण्यात भा.दं.वि. कलम ३३६, ३२३, ५०४, २६९, २७०,१८८ आपत्तीप व्यवस्थापन अधिनियम २००५ चे कलम ५१ व महाराष्ट्र दारूबंदी अधिनियम १९४९ चे कलम ६५ (डी) अन्वये गुन्हा दाखल करण्यात आला असून सहाय्यक फौजदार रविंद्र ढोबळे हे पुढील तपास करीत आहेत.
