लाचखोर भू-मोजणी कर्मचाऱ्याला ५० हजारांची लाच घेताना अटक

श्रीवर्धन (रूपेश नाक्ती) :- म्हसळा भूमिलेख कार्यालयातील भू-करमापक (सर्वेअर) विशाल भीमा रसाळ (वय २९) याला ५० हजारांची लाच घेताना लाचलुचपत प्रतिबंधक विभागाने सापळा रचून अटक केली. तक्रारदार यांच्या वरवटणे, ता. म्हसळा येथील सर्व्हे नं. ५२/१ (ब) या जमिनीची मोजणी आकारफोड व ‘क’ प्रत देणे करिता आरोपी रसाळ याने ५० हजारांची लाच मागितली होती. याप्रकरणी तक्रारदार यांनी लाचलुचपत प्रतिबंधक विभाग अलिबाग यांच्याकडे तक्रार दाखल केली. या तक्रारीच्या आधारे लाचलुचपत प्रतिबंधक विभागाने सापळा रचून भूमोजणी कर्मचाऱ्याला अटक केली.
ही कारवाई लाचलुचपत प्रतिबंधक विभाग, रायगड चे पोलीस उप अधीक्षक शशीकांत पाडावे यांच्या मार्गदर्शनाखाली सहाय्यक फौजदार विनोद जाधव, सहाय्यक फौजदार अरुण करकरे, पो.हवा./2180 महेश पाटील, चा.पो.हवा./1321 सागर पाटील यांच्या पथकाने केली.
रायगड जिल्ह्यातील सर्व नागरिकांना आवाहन करण्यात येते की, त्यांच्याकडे कोणत्याही शासकीय अधिकारी/कर्मचारी यांनी किंवा त्यांच्या वतीने खाजगी इसम (एजेंट) कोणतेही शासकीय काम करून देण्यासाठी कायदेशीर फी व्यतिरिक्त अन्य लाचेची मागणी करीत असल्यास तात्काळ संपर्क साधावा. लाचलुचपत प्रतिबंधक विभाग रायगड अलिबाग कार्यालय दुरध्वनी - 02141-222331/ टोल फ्रि क्रं. 1064, शशीकांत पाडावे, पोलीस उप अधीक्षक - लाचलुचपत प्रतिबंधक विभाग, रायगड अलिबाग. मोबाईल क्रमांक 9870332291 येथे संपर्क साधावा असे आवाहन करण्यात आले आहे.